معرفش مالي ،بقى لي فترة كل اللى يشوفني يقوللى مالك ؟ في حاجة مضايقاكي؟ ،كنت بقولهم عادي الشغل مع الدبلومة مع شوية اجهاد ، لحد ما أخت من أخواتي قالت لي : لأ عيون زهرة بتقول غير كده ، وبعدين انت من امتى بتأثر فيكي الامتحانات والحاجات دي ،خلي الكلام ده على حد تاني، بصراحة لقيت معاها حق ، انا كنت بوهم نفسي بهذا السبب فعلا!! لأني ما لقيتش غيره . وبصراحة أنا مع نفسي ما كنتش متظبطة خالص ، بدأت أتصالح مع نفسي واظبط حالي ، بس للأسف لسه حالتي النفسية مش كويسة ،بحاول اضحك واندمج في اي شيء لكن من جوايا مش مندمجة ولا مركزة في اي شيء ،حاولت اصلح كل حاجة من حوالية على اد ماقدر ،،لكن لسه برده زي ما انا !!! كنت بقول لنفسي يومين وهيعدوا ،زي ما كان بيحصل قبل كده ، و زي ما كل الناس بييجي عليها وقت وبتتعب أو تضغط نفسيا وبعدين ترجع لطبيعتها ،، لكن لقيت الحكاية مطولة وانا زي ما انا ،، مضايقة من غير سبب ،،مشتتة ومش قدره اركز ،،ما ليش نفس اعمل اي حاجة حتى الحاجات اللي لازم اعملها بعملها تأدية واجب بدون ما اعيشها او احسها ،، وده بيخليني لا ابدع او انجز في اعمالي ،،
لقيت نفسي امبارح ببكي ،،وجه في بالي ربط بين الحالة اللي انا فيها ومواقف تانية مرت عليا كنت بستغربها ، من هذه المواقف مثلا اني ابقى كويسة و اتعب او يحصلي هبوط من غير سبب او مقدمات ولما اكشف يطلع ما عنديش حاجة ، واكتشف بعدها ان حد عزيز عليا هوه اللي تعبان ،، !! وده بيهون عليا اللي بكون في ،،
لكن أصعب حاجة دلوقتي اني مش لاقيه سبب للي انا فيه ،يمكن لو عرفت سبب معين ارتاح "وهو زي ما بيقولوا :اذا عرف السبب بطل العجب"
